Toma Bebić '71: Naš Split ti je u niku ruku posta Monte Karlo... "Jo, lipega li sporta!"


Lipanj 1971: Toma Bebić, poznati splitski novinar, muzičar i pjevač napisao je specijalno za "Plavi vjesnik" zanimljiv izvještaj iz grada podno Marjana...


*****



Eto, vidim da svi opridiljeni, odnosno građani oli vlaji imaju u novinan svoj kantun, a mi neopridiljeni, odnosno i vlaji i građani, oli - ni vlaji ni građani, njanci kantunčić. Za razliku od urođenika, odnosno onizi koji su se u gradu rodili, mi naturalisti, odnosno oni koji smo se gradu naturili, pomalo poprimamo gracka znamenja.

I dobra i loša ...

A ni se ni lako oduprit. Naš Split ti je u niku ruku posta Monte Karlo. Kockarnicu i vrancusku čitaonicu jema je odavna, a niki dan su, evo, bile i trke auti.

Da znaš koji je to gušt bija za izmišano građanstvo. Cili Split ti se, moj sinko, slega kraj staze. Upeklo sunce, a judi se povalili po travi i zidićiman, pa uzdišu:

"Jo, lipega li sporta!"

Za reć pravo, najmanje su trku i gledali. Padali su vicevi. Šetalo se preko staze. Ka da su trke tovari, a ne auti! A bidni vozači - najviše su in cijukale brenze...

Najsmišnije bilo je kad se jedan "fićo" privrnija nasrid sride ceste. Sva četir kola uzarju, a par stotin duša omar oko njega ...

Šofer izađe. Ništa mu ...

"Fiću" ono svitine uvati su dva prsta, pa ga primistu u travnjak. Dok trepneš napravili su s njin striptiz. Sve značke i oznake izgubili. Ostaje samo kostur i gume, a sve drugo je ka uspomena raskomadano, pa u žepe.

Naiđu drugi auti i lipo fermaju. Jedan šofer je izaša, pripalija cigaret, nalaktija se na otvorena vrata i strpjivo čeka. Drugi je skoknija u obližnji mlični restaurant popit crnu kavu... I tako, malo poslin svit se razmaka i trka je nastavjena.

A onda su jopet fermali... Jedna žena s malin diteton u ruke prilazi mirno priko najširega dila staze. Šoferi se bunidu, a ona in ladnokrvno odgovara:

- Ajde, moji ludaši, vi i nike trke! Moran ja kuvat obid, a van ako se trče, eno van magistrala!

- Jema žena prav! - reka je stari penšjunat, koji je s bagulinon u ruke čeka momenat za na drugu stranu. - Komen se oće brzina, neka gre na Misec!

I kad je parilo da će sve svršit u miru, stazon je projurija bili auto s crvenin križon.

- Judi, to je sigurno oni crveni uletija svon forcon u publiku! - zavika je jedan glas.

- Ma ke, to su se njiova dva sudarila! - doda je drugi.

- Oli ste inšempjani! Oli nikor ni čuja kako je puklo! To se sto posto zabija u stup o' letrike! - objasnija je treći.


Od ostali novitadi glavna je da je "Ajduk" dobija vrača...



Nekolicina se ostala karat, a cila rpa šprint za bolničkin auton... U gužvi koja je nastala, bidna žena jedva je došla do daha. Bila je pala u afan, a svi su okolo tražili krv i krivca. Parilo je da in je žaj ča nima nikoga za razapet...

Ženu su bokunčić poštrapali vodon i brzo se osvistila. Sigurno je jurnjava auti uzbudila, a more bit jema slabo srce, pa ...

Nisan ni svršija mislit, a žena počne vikat.

- Ona je svemu kriva! Je li, judi, da ni istina!? Govori da će jopet poskupit cukar!

Tako su trke na kraju postale pomalo i slatkaste. A najveći eho in je da su skoro svi malolitnji i mlaji punolitnji spliski auti ostali brez poklopca na auspuhu, pa ti ovizi dana po ulican sve prdi tuta vorca ka u nikon velikon rodilištu motori.

Od ostali novitadi glavna je da je "Ajduk" dobija vrača, odnosno hipnotizera. U Splitu ni sekunda ni moga ostat brez nadimka. Omar su ga prozvali Svengali! A kako i ne bi...

Naredi igračiman da legnedu po tleju i pokriju oči crnon krpon. On side u fotelju i polako govori:

- Ruuuke su van drveneee ... noge su van od olovaaa ... glaaava van je praaazna ka tikva ... viii ništa ne misliteee... viiii ništa ne osjećateeee ... opustite seee ... viiii ste se opustiliii...

Malo poslih Svengali in diktira suprotno, pa ji probudi, a oni kad dojdu i na trening - letidu ka srne. Počeli su i besidit drukčije. Do jučer plašljivi u izjavama, već danas su sigurni da ćedu biti prvaci.

Ne smiš in se rugat, jerbo govor da je svengali za Olimpjadu hipnotizira poljske atletičare i da su od njizi 25 medalje osvojila 24!

Samo jedan da ni zaspa kako triba, pa ako je Svengalu prosik škrokavanja 25:1, onda za bile igrače zapravo nima straja, jerbo je njizi u prvoj momčadi jušto 24! Tako je oni jedan sam od sebe otpa!

Ajmo i mi virovat! Ko zna doklen čovik more ić! Ako je moga poć na Misec, past s Marsa i zavuć se u atom, more biti da more i izist balun!

Ajde, Petre, neka si mi sritno!

Tvoj Ivan iz Doca, u Splitu zvan J o h a n

(Plavi vjesnik, 1971.)



Podržite Yugopapir na Patreonu * Donate